Plataforma cidadán en defensa do círculo lítico da Mourela

Ola a toda/os:

A asociación Choiva Ázeda quere facerse eco do surximento dunha Plataforma cidadán en defensa do círculo lítico da Mourela. Como seguro que sabedes, este mércores, 10 de maio, será "barrido do mapa" polas palas excavadoras da obra da autovía As Pontes-Cabreiros, e todo sen finaliza-los arqueólogos o súa excavación. Eles mesmos, informáronnos de a aparición de novos restos (a semán pasada apareceron unhas 20 puntas de frecha).

Agora pasamos a reproduci-lo texto integro da PLATAFORMA CIDADÁ, que convoca a todos os veciños esta tarde, de luns 8 de maio ás 20:00 na biblioteca municipal, para levar a cabo unha reunión informativa, e mañá martes na Praza do Hospital ás 19:30 h. para unha concentración de protesta de toda a cidadanía pontesa.

Este é o MANIFESTO:
A Plataforma cidadán en defensa do círculo lítico da Mourela, recentemente creada por iniciativa dos veciños das Pontes e independente de calquer partido político, quere manifestar por medio desta nota de prensa as súas reivindicacións polas inmediatas obras do tramo da autovía As Pontes-Cabreiros, que suporán a desaparición definitiva do devandito haxazgo arqueolóxico.

Cabe apuntar que o problema nace co anterior goberno da Xunta, en tanto que o estudo de impacto ambiental do tramo non se recollía a existencia do haxazgo.

Non obstante, ao longo da pasada semán, parece que as presións da actual Consellería de Política territorial e das empresas adxudicatarias (“Puentes y carreteras” y “Viviendas y Ferramentos”) fixeron efecto no que en teoría é a entidade administrativa con maior capacidade para a preservación do patrimonio histórico de Galicia, como é a Direción xeral de patrimonio, dependente da Consellería de Cultura.

Así, a partir deste martes día 9 de maio, unha vez finalizado os dez días de permiso de excavación que dita entidade concedeu ao Laboratorio de investigacións arqueolóxicas do Concello de As Pontes; os 5.000 anos de historia do círculo lítico serán aniquilados polas maquinarias das empresas adxudicatarias da construción.

Se ben a autovía Ferrol-Vilalba é algo esencial para o futuro desenvolvemento do Concello das Pontes, e que o retraso da súa finalización suporía un incremento do orzamento inicial, non é motivo como para non aumentar a marxe de tempo para levar a cabo as investigacións pertinentes sobor dun elemento patrimonial de gran importancia non só a nivel local, senón tamén galego e europeo.

A cidadanía pontesa non pode quedar impasible ante tal “barbarie”, polo que convocamos a todolos/as veciños/as das Pontes a unha concentración que terá lugar o martes día 9 ás 19:30 horas na praza do hospital. Despois, ás 20:30 horas terá lugar unha charla informativa para analizar a situación actual e definir as medidas a levar a cabo nos seguintes días, nos que está previsto o comezo das obras.

A concentración só sería descombocada en caso de que algún cargo público competente tomara cartas no asunto e paralizase as obras temporalmente.

A Asociación Choiva Ázeda apoia esta Plataforma e pedimos a todos aqueles que desexen que non se leve a cabo ésta tropelia, asistan mañá a concentración de protesta e así mesmo apoien os actos que a Plataforma Cidadán ten deseñados, para que entre todos paremos esta obra, ata que polo menos, se remate de realiza-los traballos arqueolóxicos de escavación do monumento megalítico. Hai que recordar, que o círculo lítico é o máis importante destas características atopados en Galicia, só comparable con outros de Irlanda e Bretaña.